Tangaza Nasi

Friday, 24 October 2014

CHIDI BENZI AKAMATWA NA POLISI, ATUHUMIWA KUKUTWA NA DAWA ZA KULEVYA UWANJA WA NDEGE

Chid Benz
DSM Airport
MSANII wa muziki wa kizazi kipya Chidi Benz amekamatwa na dawa za kulevya katika uwanja wa ndege wa kimataifa wa Julius Nyerere Dar es Salaam akiwa anaelekea Mbeya kwenye show ya Instagram Party inatarajiwa kufanyika kesho Jumamosi.

Msanii huyu amekamatwa leo mchana akiwa katika sehemu ya kuondokea uwanjani hapo; baada ya kukamatwa alifanyiwa upekuzi na kubainika akiwa na misokoto miwili ya bangi na kete 14 za dawa hizo dawa za kulevya zilizokutwa kwenye mfuko wa shati lake.

Kamishna Msaidizi wa Polisi (ACP) Hamisi Selemani ambae ni kamanda wa polisi wa viwanja vya ndege Tanzania amethibitisha kukamatwa kwa Chidi Benz aliyehojiwa na kukiri dawa hizo ni zake.

Selemani amesema “alikuja Airport kwa ajili ya safari kwenda Mbeya; alikutwa na, kete hizo 14 za dawa za kulevya zikiwa zimefungwafungwa na nailoni na pia amekutwa na vifaa vingine vinavyohusiana na watu wanaotumia dawa za kulevya, kuna kigae na kijiko na yeye mwenyewe amekiri ni vitu vyake anavyovitumia.”

Katika mahojiano na Polisi, Chid Benz anaelezwa kushangaa kwanini dawa hizo zilikuwa kwenye mfuko wa shati lake.


Selemani amesema Chidi Benz atafikishwa mahakamani wakato wowote kuanzia sasa mara tu baada ya kubaini aina ya dawa hizo za kulevya.
chanzo;millardayo.com 

NUKUU YA WIKI "NI MATUSI KUAMBIWA NIKO NYUMA YA LOWASSA KATIKA MBIO ZA URAIS"

Januari Makamba
NI matusi makubwa kuambiwa niko nyuma ya Lowassa katika mbio hizi za urais.


“Mimi ni mtu mzima, nina utashi wangu, nina familia yangu, nina mke na watoto, ni kiongozi wa jimbo, nina nyadhifa serikali na kwenye chama, kuniambia mimi nafanya jambo fulani kwasababu ya mtu fulani ni matusi makubwa sana na naomba niombwe radhi,” Januari Makamba alisema

CHADEMA YAPATA HATI YA SHAKA TOKA KWA MKAGUZI NA MDHIBITI WA HESABU ZA SERIKALI (CAG)


Chama cha Demokrasia na Maendeleo (Chadema) kimepata hati yenye shaka kutoka kwa Mkaguzi na Mdhibiti Mkuu wa Hesabu za Serikali (CAG) baada ya kupokea ripoti ya ukaguzi wa hesabu zake zinazoishia Juni 2011/12 na 2012/13

Ukaguzi huo ulifanyika kwa mujibu wa sheria namba 5 ya mwaka 1992 ya vyama vya siasa, iliyofanyiwa marekebisho na sheria namba 7 ya mwaka 2009, unampa CAG mamlaka ya kukagua hesabu za vyama vya siasa.

Katika ripoti hiyo kwa hesabu zilizoishia Juni 30, 2012, CAG ametilia shaka maeneo mbalimbali. Mkaguzi anasema katika ripoti hiyo kuwa Chadema kilionyesha kina mali zenye thamani zaidi ya Sh650 milioni, ambazo ni magari, mashamba, nyumba na pikipiki. Hata hivyo, CAG anasema hakuona kitabu cha
usajili wa mali hizo.

Pia, ripoti hiyo inaeleza kuwa Chadema ina akaunti zaidi ya 200, ikijumlisha akaunti za makao makuu, kanda, mikoa, wilaya na majimbo. Shaka ya mkaguzi ni kwamba hakuona salio la kufungia kitabu likihusisha akaunti zote zinazotumia jina la Chadema.

Chadema kilitoa utetezi wake kuwa akaunti kuu ya chama ndiyo inatoa fedha kwa akaunti za mikoani, hivyo wanaona mgao huo wa fedha ni sehemu ya matumizi yao.

Mkurugenzi wa Fedha na Utawala wa Chadema, Anthony Komu alisema Chadema iliwasilisha salio la akaunti kuu kwa kutambua kuwa akaunti za mikoani zinapokea fedha kutoka makao makuu, hivyo waliona hiyo ni sehemu ya matumizi yao.

“Chama chetu kimepokea taarifa aliyoitoa CAG na tunaichukua kama sehemu muhimu ya kuboresha ujenzi wa chama chetu kama taasisi ya kudumu na inayokua. Tutazifanyia kazi changamoto zote alizoziainisha,” alisema Komu.

Aliongeza kuwa chama chake kinamtaka CAG aweke bayana ni vyama vingapi havijakaguliwa na lini vitakaguliwa. Alivitaka vyama vingine vilivyokaguliwa vitoe taarifa zao ili Watanzania wajue.

“Tunakumbuka CAG alitoa kauli bungeni kuwa si vyama vyote vimekaguliwa. Kama sehemu ya jamii na chama kinachopigania utawala wa sheria, aweke wazi ni vyama gani havijakaguliwa na kwa sababu gani,” alisisitiza mkurugenzi huyo.

Mkurugenzi wa masuala ya Bunge na Halmashauri, John Mrema alisema mpaka kufikia jana (juzi) walibaini kuwa Chama cha Mapinduzi (CCM) kilikuwa hakijakaguliwa hesabu zake Alisema waliamua kupigania CAG kukagua hesabu za vyama vya siasa kwa sababu mwaka 2005 walibaini kuwa CCM ilitumia fedha za EPA katika kampeni zake.

 Aliongeza kuwa hawakutaka utamaduni huo ujirudie. “Kwa mujibu wa taarifa kutoka Kamati ya Bunge ya Hesabu za Umma mpaka kufikia jana, CCM kilikuwa bado hakijakaguliwa,” alisema Mrema na kuongeza kuwa chama chake kimeonyesha mfano licha ya mapungufu yaliyobainika.

Alipouliza juu ya kukaguliwa kwa chama chake, Katibu wa Itikadi na Uenezi wa CCM, Nape Nnauye alisema Chadema wanakuja na jambo ambalo lilishatolewa ufafanuzi siku nyingi.

Alisema chama chake kilieleza na kutoa vithibitisho kuwa walikaguliwa. Nnauye aliongeza kuwa CAG pia alilitolea maelezo jambo hilo mara nyingi kusisitiza kuwa alishakikagua Chama cha Mapinduzi.

“Sasa hawa Chadema wamegeuka kuwa wasemaji wa CAG? Kwanini nanyi msiende kumuuliza CAG juu ya jambo hili. Ina maana mmeshasahau tuliyowahi kusema au aliyowahi kueleza CAG juu ya ukaguz?” alihoji Nnauye na kusisitiza aulizwe CAG.

Hata hivyo, imebainika kuwa utekelezaji wa sheria ya ukaguzi wa vyama vya siasa umeanza kutiliwa mkazo miaka ya hivi karibuni, huku Chadema kikimsukuma CAG kufanya ukaguzi kila mwaka.

Kwa hesabu za mwaka ulioishia Juni 30, 2013, ripoti ya CAG imetilia shaka kutoonekana kwa kitabu cha makusanyo ya fedha chenye namba 451 – 500 kilichorekodiwa katika vitabu vyao kuwa kilikusanya zaidi ya Sh31 milioni.

Kadhalika, mkaguzi mkuu alihoji ununuzi wa magari 10 ya CMC (Ford Rangers) bila kushirikisha kamati ya zabuni ambayo ndiyo ina dhamana na manunuzi yote ya kichama.

Hata hivyo, Komu alifafanua kuwa uamuzi ulifanywa na kamati kuu na kamati ya katiba kupewa taarifa.



Ununuzi wa jenereta lenye thamani ya Sh27.5 milioni unaelezwa zabuni haikutolewa kwa ushindani, jambo ambalo mkurugenzi wa fedha alisema walifanya utafiti na kubaini kuwa ni kampuni moja tu ndiyo ilikuwa na jenereta waliyoihitaji.
chanzo;mpekuzihuru.com

BAADA YA VURUGU NA KUCHOMA BWENI, KILA MWANAFUNZI NJOMBE SEKONDARI KULIPA SH150,000

Kamanda wa Polisi Mkoa wa Njombe, Fulgance Ngonyani akiangalia bweni la shule ya sekondari Njombe lililoteketea kwa moto
SHULE ya sekondari ya Njombe (Njoss) imefungwa kwa mwezi mmoja baada ya wanafunzi wake kufanya vurugu, kuchoma bweni na mali zingine za shule hiyo na kusababisha hasara inayokadiriwa kuwa sh Milioni 100.


Ili kufidia hasara hiyo, kila mwanafunzi wa shule hiyo atatakiwa kurejea shuleni hapo akiwa na mzazi au mlezi wake pamoja na Sh150,000 kwa ajili ya kufidia mali zilizoharibiwa.

CCM MKOA WA IRINGA YAKANUSHA TAARIFA ZA MITANDAONI DHIDI YA CHADEMA, KUFANYA MKUTANO WA HADHARA KESHO

Katibu wa CCM Mkoa wa Iringa Hassana Mtenga
CHAMA cha Mapinduzi (CCM) mkoa wa Iringa kimekanusha taarifa zinazosambazwa kwenye mitandao ya kijamii zinazoonesha kuwahamasisha wanachama wake kuwafanyia vurugu wanachama wa Chama cha Demokrasia na Maendeleo (Chadema).

Katibu wa CCM Mkoa wa Iringa, Hassana Mtenga amesema; “Moja ya nguzo kuu ya CCM ni umoja, amani, upendo na mshikamano.”

Mtenga amesema hayo wamekuwa wakiyahubiri kila siku na wataendelea kufanya hivyo kila watakapopata nafasi kwasababu wanafahamu athari za machafuko kwa kuangali kile kilichotokea na kinachoendelea kutokea katika nchi jirani.

Amesema watu wasiokitakia mema chama hicho wamenukuu taarifa potofu na kuisambaza mitandao ikiwaamuru wanachama wa chama hicho kuwapiga na hata kuwatoboa macho wana Chadema.

“Huu ni uzushi mkubwa, uzushi unaotia aibu, uzushi usiopaswa kuvumiliwa hata kidogo kwasababu unalenga kuhatarisha usalama wa wanachama wa vyama hivi viwili kwa maslai ya watu wachache,” alisema.

Mtenga amesema CCM na Chadema vitashindana kwa hoja kwa kuzingatia kwamba hiyo ndiyo demokrasia yenyewe.

Wakati huo huo, Chama hicho kimetangaza kufanya mkutano wa hadhara kesho jumamosi katika uwanja mpana wa stendi ya mabasi ya vijijini ya Mlandege, uliotumiwa hivi karibuni na viongozi wa kitaifa wa Chadema.

Mtenga amewataka wakazi wa manispaa ya Iringa na vitongoji vyake, wapenzi na wanachama wa chama hicho, na wapenzi na wanachama wa vyama vya upinzani kujitokeza kwa wingi kusikiliza mapigo yao ya kisiasa dhidi ya Chadema.

Mkutano huo utakaohutubiwa na viongozi mbalimbali wa chama hicho utaanza saa nane mchana.

VIJIJI VYAFUTWA, KATA ZONGEZEKA JIMBO LA IRINGA MJINI

Mkurugenzi wa Manispaa ya Iringa, Theresia Mahongo
KWA kuzingatia tangazo la serikali namba 300 la mwaka 2012 linaloelezea mamlaka za utawala katika mamlaka za serikali za mitaa mwaka 2014, halmashauri ya manispaa ya Iringa imekubaliwa kuongeza kata zake kutoka 16 hadi 18.

Mkurugenzi wa Manispaa hiyo, Theresia Mahongo amesema kata hizo zimeongezeka baada ya kata mbili kati ya 16 kugawanywa.

Kata hizo ni ya Ruaha iliyogawanya na kuwa na kata ya Ruaha na Igumbilo na kata ya Mkimbizi iliyogawanywa na kuwa kata ya Mkimbizi na Mtwivilla.

Mahongo amesema kwa kupitia waziri mwenye dhamana na serikali za mitaa, imeridhia kufutwa kwa vijiji na kubakiwa na mitaa.

Vijiji vilivyofutwa ni pamoja na Igumbilo, Nduli, Kigonzile, Mgongo na Itamba na akaongeza kwamba kufutwa kwake kunaifanya manispaa hiyo kuwa na mitaa 192 kutoka mitaa 149 ya awali.

Kuhusu kuhuisha rejesta ya wakazi katika mitaa, Mahongo amewataka wananchi wote wa manispaa kujitokeza na kujiandikisha katika rejesta ya wakazi katika mitaa wanayoishi.

Rejesta ya wakazi katika kila mtaa inatoa taarifa zote muhimu za wakazi wa mtaa na vitongoji katika eneo husika.

Taarifa zinazotakiwa katika daftari hizo ni pamoja na jina mkazi, umri, mtaa anaoishi, idadi ya watoto kama wapo na zinginezo katika kaya.

Mahongo amesema rejesta hiyo iliyoanzishwa chini ya sheria ya serikali za mitaa ya mwaka 1982 ni muhimu kwasababu inawezesha kufahamu idadi ya wakazi katika kila mtaa na kuiwezesha halmashauri kuandaa mipango kwa kuzingati idadi ya watu wake.

Wanaotakiwa kusimamia zoezi la uboreshaji wa rejesta hiyo kwa mujibu wa Mahongo ni watendaji na wenyeviviti wa mitaa.

Thursday, 23 October 2014

HUKUMU YA KIFO YATANGAZWA KWA WANAWAKE WANAOJIUZA NA WATEJA WAO

Prosti

Katibu wa maendeleo ya jamii katika jiji la Abuja Nigeria, ametangaza ‘kiama’ kwa wanawake wanaofanya ‘biashara ya kujiuza’ pamoja na wateja wao.

Taarifa iliyochapishwa na Today Internet Newspaper imesema, katibu mkuu huyo Blessing Unoh amesema serikali imetoa amri ya kusitisha biashara hiyo ndani ya saa 48, kwa yeyote atakayekiuka hatua kali za kisheria zitachukuliwa dhidi yake.

Amri hiyo imetolewa saa chache baada ya katibu mkuu huyo kutembelea maeneo mbali mbali ambayo yamebobea kwa biashara hiyo ambapo amejionea hali halisi iliyopo.

Aidha amesema kwa yeyote atakekiuka amri hiyo na kukutwa na hatia ya kutenda kosa hilo awe tayari kukabiliana na hukumu ya kifo.
chanzo;millardayo.com


META ZA UJAZO MILIONI 68 ZA MITI ZAOMBWA KUVUNWA KILA MWAKA MUFINDI

Meneja wa shamba la misitu Saohill, Saleh Beleko
Baadhi ya wavunaji katika picha
WASTANI wa meta za ujazo Milioni 68 za miti zinaombwa kuvunwa kila mwaka katika shamba la Taifa la Misitu la Saohill wakati kiasi kinachoruhusiwa kuvunwa ni wastani wa meta za ujazo 650,000.

Hayo yalisema hivikaribuni na meneja wa shamba hilo, Saleh Beleko katika kikao kilichowakutanisha wawakilishi wa wizara ya maliasili na utalii na wavunaji.

Alisema takwimu hizo zinaonesha ukubwa wa mahitaji ya kiasi cha miti kinachoombwa kuvunwa kila mwaka.

Alisemahekta 52,070 zimepandwa miti aina ya mikaratusi na misindano katika shamba hilo lenye ukubwa wa hekta 135,903 zilizohifadhiwa.

“Hekta 33,933 ni kwa ajili ya upanuzi wa upandaji miti na hekta 48,200 ni maeneo ya misitu ya asili ambayo sehemu yake kubwa ni kwa ajili ya vyanzo vya maji na hekta 1,700 ni maeneo ya makazi na matumizi mengine,” alisema.

Mkuu wa wilaya ya Mufindi uliko msitu huo, Evarista Kalalu aliwasihi wavunaji kuingia kwenye shughuli za upandaji miti ili kukabiliana na upungufu huo.

“Vinginevyo viwanda vyenu vitateketea kwasababu hamuwezi kupata mahitaji yenu ya kila mwaka kwa kutegemea msitu huu,” alisema.

Naye Mwenyekiti wa halmashauri ya wilaya ya Mufindi, Peter Tweve alisema pamoja na kujishughulisha na uvunaji na upandaji miti, wavunaji wanatakiwa wawe na shughuli nyingine za maendeleo.

“Mufindi haiwezi kuishi kwa kutegemea msitu wa saohill pekee. Ni rasilimali muhimu kwetu lakini tunahitaji kujikita kwenye shughuli zingine za maendeleo ya kuongeza kasi ya ukuaji wa uchumi wa wilaya yetu,” alisema.

Awali Mwenyekiti wa Umoja wa Wavunaji Miti Saohill (UWASA), Christian Aia alisema wavunaji katika msitu huo wanapaswa kupendana ili kuikuza sekta hiyo.

Aia alisema migogoro ya uvunaji wa miti inayotokea mara kwa mara imekuwa ikichochewa na wavunaji wenyewe ambao kwa muda mrefu wameshindwa kufanya kazi kwa pamoja kama wadau wenye maslai yanayofanana katika sekta hiyo.

Katibu wa umoja huo, Dk Basil Tweve alisema kiwango cha ubinafsi miongoni mwa wavunaji ni kikubwa hali inayosababisha washindwe kukaa kwa pamoja na kuzungumzia matatizo yao.

“Muda umefika kwa wavunaji kuwa kitu kimoja, maendeleo ya sekta hii yanatutegemea, hatuwezi kuonesha mchango wetu kama hatutaungana,” alisema huku akiahidi kulifanyia kazi suala la wavunaji kuingia katika upandaji.

Wakati huo huo UWASA imeiomba wizara kwa kushirikiana na meneja wa shamba la saohill lifanye ukaguzi rasmi wa viwanda vya uchakataji wa mazao ya misitu.

Mwenyekiti wa umoja huo alisema serikali inapaswa kuilinda sekta ya viwanda vya mbao kwani vina mchango mkubwa kwa taifa na watu wake.

“Tunaomba serikali isaidie kuvihakiki viwanda hivi, kuviboresha na kuvipa kila aina ya misaada itakayosaidia visife,” alisema.

KIMOTCO NA FROLIDA EXPRESS ZAVAANA USO KWA USO, ABIRIA ZAIDI YA 100 WANUSURIKA

Basi la Frolida baada ya ajali hiyo
Basi la Kimotco baada ya ajali hiyo
Baadhi ya abiria waliokuwemo katika mabasi hayo
Kimotco linavyoonekana kwa mbele baada ya ajali hiyo
ABIRIA zaidi ya 100 wamenusurika kufa katika ajali iliyotokea katika mlima Nyang’oro, barabara ya Iringa Dodoma.

Ajali hiyo iliyohusisha mabasi mawili, Kimotco lenye namba za usajili T449 CAL na Frolida lenye namba T571BDX ilitokea majira ya saa moja asubuhi ya leo.

Wakati Kimotco lilikuwa likielekea Arusha, basi la Frolida lilikuwa likitokea Mtera kwenda Iringa Mjini.

Mmoja wa watu aliyenusurika katika ajali hiyo ni Samsoni Kikoti wa mtandao huu wa BONGO LEAKS aliyekuwa katika basi la Kimotco akielekea mkoani Tabora.

Chanzo cha ajali hiyo kimeelezwa na Kikoti kwamba ni makini mdogo wa dereva wa basi la Frolida aliyafahamika kwa jina moja la utani la Dulayo kuendesha basi hilo kwa mwendo mkali kwenye kona kali za mlima huo.

Akiwa katika mwendo huo, dereva huyo alishindwa kumudu moja ya kona za mlima huo wakati akipishana na Kimotco na kusababisha ajali hiyo.


Jeshi la Polisi limethibitisha kutokea kwa ajali hiyo.

CWT NJOMBE YATAKA SERIKALI ISITISHE BIASHARA HURIA YA VITABU VYA KIADA

Mkuu wa Wilaya ya Njombe, Sarah Dumba
CHAMA cha Walimu Tanzania (CWT) Wilaya Njombe kimeitaka serikali kusitisha biashara huria ya vitabu vya kiada kwa kile walichoeleza kwamba vinakinza na kuwapa ugumu katika ufundishaji.

Ombi hilo lilitolewa hivi karibuni wakati chama hicho kikiadhimisha siku ya walimu iliyofanyika mjini Makambako, wilayani humo.

“Kama ikishindwa kusitisha, tunashauri kabla vitabu hivyo havijaingizwa sokoni, serikali ifanye utaratibu wa kubihariri na kuvigonga mihuri maalumu ili kuwahakikishia walimu kwamba vimethibitishwa,” alisema Katibu wa CWT Njombe, Salama Lupenza.  

Aidha chama hicho kimeita serikali kufanya tafiti za kutosha katika miradi yake ukiwemo mpango wa matokeo makubwa sasa (BRN) unaolalamikiwa kuwazidishia mzigo wa uwajibikaji bila nyongeza ya marupurupu.

Lupenza alisema pamoja na mpango huo kuanza kuongeza tija katika sekta mbalimbali za kimaendeleo, hali ya walimu imeendelea kuwa vile vile.

“Tunasikitishwa sana, pamoja na mafanikio ya BRN, hakuna chochote kinachofanywa na serikali kuboresha maslai ya mwalimu,” alisema.

Kwasababu serikali haizifanyii kazi kwa wakati kero mbalimbali zinazowasibu, Lupenza alisema katika maeneo mbalimbali nchini walimu wanapoteza hali ya kuipenda kazi hiyo na kuifanya kwa nguvu zao zote jambo linaloweza kuhatarisha zaidi maendeleo ya sekta hiyo.

“Kwa upande wa sekta yetu hii ya elimu, BRN inaonekana kumjali zaidi mwanafunzi lakini inamsahau mwalimu mwenye wajibu mkubwa wa kumuwezesha mwanafunzi kufikia mafanikio yake,” alisema.

Alisema tofauti na miaka ya nyuma ambapo kazi ya ualimu ilikuwa na hadhi kubwa mbele ya jamii, hivisasa hali hiyo haipo tena kwani ualimu imekuwa ni kazi inayodharauliwa na wengi.